拒絕C朗　車路士將與古古列拿續約

沙特豪門艾納斯早前簽入祖奧菲歷斯後，一度傳出有意再斟車仔左閘古古列拿，據報車路士同球員都用行動拒絕，雙方即將續約，令對方死心。

C朗同艾納斯續約後，近期推動多宗增兵交易，包括用重金5,000萬歐元向車路士簽入祖奧菲歷斯，完成交易後，C朗再提出以7,000萬歐元(約6.4億港元)斟介古古列拿。

「轉會專家」羅曼諾報道，古古列拿同車路士尚有3年合約，該西班牙國腳已拒絕艾納斯，而車路士亦為球員提供新約，談判接近完成，古古列拿對於續約很高興，球會高層亦對球員忠誠好滿意，賓主盡歡。

27歲嘅古古列拿2022年夏天由白禮頓轉投車路士，當時轉會費總值高達6,300萬鎊，古古列拿加盟車仔初期正值球隊低潮，但上季球隊谷低反彈，古古列拿成為馬利斯卡麾下必然正選，上季上陣54場入7球，是球隊連奪歐協聯及世冠盃功臣。