摩納哥大減價　利華古遜有望簽艾利奧捷

利華古遜今夏高價出售多位主力後，目前銀彈充足，佢哋留意多時嘅摩納哥法國奧運腳翼鋒艾利奧捷，終於可以入手，據報摩納哥就艾利奧捷叫價亦大幅下降，令利華古遜大有機會買入心頭好。

德國傳媒報道，摩納哥為艾利奧捷標價傳聞高達7,000萬歐元(約6.4億港元)，雖然利華古遜高價出售多名主力後大把錢，但佢哋從來唔會用巨額資金收購單一球員，艾利奧捷並未吸引頂級豪門斟介，摩納哥調低標價後，利華古遜就可以着手斟介。

摩納哥為艾利奧捷最新標價為5,000萬歐元(約4.56億港元)，更貼近佢嘅市場估價4,500萬歐元，同摩納哥合約尚餘3年，利華古遜現將其列為頭號目標。

不過利華古遜對艾利奧捷並非志在必得，並已準備Plan B，就係一旦未能簽入艾利奧捷，就會轉斟曼城新星、有「新高爾彭馬」之稱嘅麥卡迪。