【有片】C朗弗爆連中三元　同菲歷斯夢幻連線


C朗同菲歷斯場上合作無間。

即將喺月底訪港踢沙超盃嘅艾納斯，周五(8日)凌晨喺葡萄牙踢熱身賽，4比0大炒葡超球隊里奧艾維。40歲嘅C朗拿度繼續弗爆狀態，個人大演帽子戲法；新加盟嘅祖奧菲歷斯亦交2次助攻兼博到12碼，其中佢同C朗精彩撞牆入波盡顯完美默契。

艾納斯上月同C朗續約後，再羅致葡萄牙國腳祖奧菲歷斯，呢位進攻中場今仗表現搶鏡，15分鐘頭槌助攻施馬根開紀錄；完半場前菲歷斯再同C朗完美配合，禁區頂精彩撞牆後由C朗狂抽入網。C朗喺63分鐘頭槌頂成3比0後，菲歷斯68分鐘再博到12碼，C朗操刀完成帽子戲法，並帶領艾納斯大勝4比0。

菲歷斯博12碼，C朗操刀射入：https://x.com/i/status/1953559347893543042　

艾納斯目前積極增兵，據報艾納斯接近完成簽入西班牙中堅恩尼高馬天尼斯，呢位34歲中堅上季為巴塞隆拿上陣46場，雖然本身仲有1年合約，但巴塞同意畀佢免費轉會，以騰出薪酬空間註冊新球員。艾納斯周一(11日)凌晨會喺最後熱身賽對艾美利亞，之後就嚟香港踢沙超盃。