倒戈被羅美路追住踢 哈利卡尼射爆熱刺
周五(8日)凌晨熱身賽，德甲冠軍拜仁慕尼黑4比0大炒熱刺，倒戈嘅哈利卡尼今場雖然受到舊隊友兇狠「招呼」，但佢就用入波還擊，賽後亦向老拍檔孫興民送上祝福。
拜仁前鋒哈利卡尼倒戈曾效力14年嘅熱刺，被舊隊友基斯甸羅美路全程追住踢，羅美路至少兩次唔收腳踢到哈利卡尼飛起，好在呢位英格蘭前鋒並冇受傷，12分鐘更喺禁區內一控一射先開紀錄。哈利卡尼之後有12碼宴客，但拜仁仍然控制大局，下半場再由京士利高文、小將卡爾同艾沙利入波，湊成4比0大勝。
今場係熱刺喺孫興民離隊後首場比賽，哈利卡尼亦祝福老拍檔喺美職發展順利：「我要祝賀孫興民喺熱刺嘅成就，佢係個大好人，亦係好好嘅朋友，我同佢有好好嘅聯繫，喺球場上係英超史上最佳組合之一。」熱刺今場慘敗後，將會喺下周四(14日)嘅歐超盃挑戰巴黎聖日耳門。