未開波已收咧　高維爾重傷長抖

英超仲未開鑼，車路士已經有球員受傷長抖，中堅利維高維爾操練期間，整傷膝部十字韌帶，立即喺周四(7日)接受手術，預料將缺陣新一季大部分賽事。

車路士領隊馬利斯卡透露，利維高維爾喺周一(4日)練波時受傷，經過醫生評估後，認為呢位22歲英格蘭國腳需要做手術根治傷勢，並已經完成手術，將展開漫長康復治療，估計需要休戰6至9個月，意味將錯過新球季大部分賽事。

利維高維爾上季為車路士上陣43場，其中40場擔任正選，除咗防守穩陣之外，仲有2球進帳及2次助攻，屬於球隊奪得歐協聯及世冠盃冠軍主力，佢長抖之下，勢必影響領隊馬利斯卡部署。

車路士早前已收購阿積士中堅祖利爾哈圖，呢位19歲荷蘭國腳可望頂替利維高維爾位置，會方正在考慮是否需要再簽入中堅。