施斯高飛抵曼市體測　合約人工細節曝光

曼聯「未來神鋒」班捷文施斯高已經抵達英國曼徹斯特，將於周五(8日)稍後時間接受體測，如無意外，雙方將簽約至2030年6月。據悉呢位22歲斯洛文尼亞國腳獲得16萬鎊(約169萬港元)周薪，如果紅魔鬼取得歐聯入場券，佢可以加薪25%。

「轉會權威」記者羅曼諾(Fabrizio Romano)獨家上載班捷文施斯高同經理人乘坐私人飛機去曼市嘅相片，英國《太陽報》指呢位射手抵步後，有私家車接佢前往酒店，之後將去曼聯卡寧頓訓練基地接受體測。據悉班捷文施斯高有望周六(9日)晚亮相奧脫福球場，同球迷見面，並觀看曼聯主場對費倫天拿嘅熱身賽。

班捷文施斯高效力RB萊比錫兩季合共上陣87場入39球，包括上季有21球進帳，佢加盟曼聯轉會費總值達7,400萬鎊(約7.8億港元)。施斯高成「魔」後，進一步增加隊內前鋒海倫離開可能性，意大利傳媒指曼聯願意外借呢位丹麥國腳，AC米蘭已經提出借用，但仲要睇海倫是否願意重返意甲搵食。