鬥到底！巴塞褫奪達史特根隊長職務

巴塞隆拿同德國門將達史特根反面後，雙方角力愈鬥愈臭！拒絕被巴塞逼走嘅達史特根，早前做完手術後拒絕提交醫療報告，令巴塞未能轉移佢嘅薪酬空間；巴塞周四(7日)就宣布，因紀律問題暫停達史特根隊長職務，各不相讓。

效力巴塞11年嘅達史特根，上年重傷後被打入冷宮，巴塞今夏更簽入祖安加西亞出任正選門將，令達史特根非常不滿，並堅持留隊拒被「逼走」。達史特根上月宣布做背部手術，「理論上」要抖4至5個月，令巴塞可以按傷兵條例，將達史特根嘅薪酬轉移註冊其他新球員，不過達史特根堅持自己最多只要抖3個月，並拒絕向西甲提交醫療報告。

對於達史特根唔合作態度，巴塞宣布對佢進行紀律聆訊，並暫時停止佢嘅隊長職務，由副隊長朗奴阿拿奧祖代替。據西班牙《每日體育報》爆料，達史特根對被罷黜不為所動，同巴塞嘅對峙更升級，禁止球會嘅醫療人員去佢屋企。