紐卡素又被截胡　拜仁斟介尼高拉斯積遜

紐卡素今夏收購前鋒，頻頻遭對手截胡，「喜鵲」被曼聯搶走班捷文施斯高後，原本退而求其次，準備收購車路士前鋒尼高拉斯積遜，但又遇阻滯，英國《太陽報》指拜仁慕尼黑亦有興趣簽呢位塞內加爾國腳。

由於首席射手阿歷山大伊沙克早前提出轉會，希望加盟利物浦，紐卡素急需要簽入前鋒取代呢位瑞典國腳，但3大目標人物馬菲奧斯根夏、麥比奧莫、班捷文施斯高都選擇加盟曼聯，惟有向尼高拉斯積遜埋手。

「轉會權威」記者羅曼諾(Fabrizio Romano)指車仔已經將尼高拉斯積遜、尼干古掛牌出售，兩人唔會再參與未來賽事，理論上紐卡素要簽入積遜，相對比較容易，但原來拜仁慕尼黑都睇中佢，並向車仔問價。

車路士之前將尼高拉斯積遜標價為8,000萬鎊，估計唔會有球隊願意出呢個價錢收購呢位經常浪費入波機會嘅「敗家仔」，紐卡素、拜仁比較大機會提出借用，現時就要睇積遜想留喺英超比賽，抑或去德甲搵食。