英雄式回歸　曼聯將頒獎畀迪基亞

曼聯將於周六(9日)晚熱身賽主場對費倫天拿，現時效力「紫合百」嘅前紅魔鬼鋼門迪基亞將首次回歸奧脫福球場倒戈，曼聯會方決定開賽前，舉行1次簡單而隆重儀式，頒發獎項畀迪基亞，表揚呢位34歲西班牙球星效力紅魔鬼12年作出嘅貢獻。

據悉曼聯隊長般奴費南迪斯屆時負責向迪基亞頒發獎座，接受球迷致敬，般費率先喺社交網歡迎呢位前隊友：「大衞(迪基亞)，我嘅朋友，急不及待想喺熱身賽見到你，希望你享受返回奧脫福，見到你嘅球迷、你嘅球場、你嘅家，但我想喺比賽射入你嘅大門幾球，一齊享受比賽。」

迪基亞日前亦喺社交網事先張揚，話期待重返奧脫福球場比賽，引來大量紅魔鬼球迷留言，包括有人話：「比賽之後，我哋唔會畀你離開奧脫福，費倫天拿可以帶走奧拿拿。」可見佢仍然非常受曼聯球迷歡迎。

迪基亞2011至23年效力曼聯期間，上陣545次，協助球隊奪得5項重要錦標，包括捧1次英超及1次歐霸盃冠軍，但2年前約滿後，不獲續約，盛傳係前主帥坦哈格為簽入愛將奧拿拿，所以放棄迪基亞，呢位荷蘭名帥已離隊，迪基亞回歸唔使重遇「仇家」。