【有片】車路士輕取利華古遜 神童首演變個人騷
英超勁旅車路士上月贏得世冠盃冠軍後，周六(9日)凌晨首披「世界冠軍」戰衣重新上路，喺熱身賽主場2比0輕取利華古遜。新加盟嘅18歲神童艾斯迪華奧今場首演，即刻展現出強大統治力，主宰球隊進攻之餘仲拎到處子入波，領隊馬利斯卡對佢亦讚不絕口。
今場係車仔首場季前熱身，不過球員狀態唔錯，全場控制大局，以正選右翼「地標」上陣嘅艾斯迪華奧表現勁活躍，同高爾彭馬經常眉來眼去，18分鐘高爾彭馬射門中楣，艾斯迪華奧門前窩利補中。半場高爾彭馬退下火線，艾斯迪華奧轉踢「10號位」一樣掂，車仔完場前由祖奧柏度入多粒，輕鬆贏2比0。
車路士喺上年已經斥2,900萬鎊向彭美拉斯「預購」艾斯迪華奧，佢上月世冠盃代表彭美拉斯出戰，最後1個入波就係攻破車路士大門。今次首演就成為艾斯迪華奧個人騷，數據相當驚人，7次射門、9次禁區內觸球、3次扭波過人、3次創造機會都係全場最高。
馬利斯卡喺開波前表示，艾斯迪華奧踢法同高爾彭馬相近，可以踢前場多個位置，見證呢位巴西新星首演後，馬利斯卡繼續大讚：「艾斯迪華奧仲係非常非常年輕，但正如我之前所講，佢將會幫助車路士，佢係個神奇球員！」車路士周日(10日)會友賽AC米蘭，之後就迎接英超開鑼。