英冠火爆開鑼！16人混戰　狂迷圖襲擊球員


葉士域治已向足總舉報球迷襲擊球員事件。

英冠周六(9日)凌晨展開，開鑼戰即出現濃厚火藥味，伯明翰喺主場領先之下，被葉士域治喺補時靠爭議12碼逼和1比1，雙方球員隨即爆發衝突，出現16人大混戰場面，更有狂迷加入戰團意圖打球員，幸被保安制服，葉士域治表示已向足總舉報。

由英甲升班嘅伯明翰，今場表現較佳，55分鐘由史丹斯菲特入波領先；葉士域治之後換入艾舒利楊格等球星，尾段搶番唔少攻勢，補時5分鐘角球攻門頂中連當戴基斯隻手，球證直指12碼，佐治希斯操刀射入後，走去主場球迷面前疑似做出挑釁動作。

伯明翰球員見到後上前理論，引發雙方球員互相推撞，有狂迷更跳過欄杆加入戰團，一度舉拳想打葉士域治嘅積克泰萊，幸被保安及時拉住制服。葉士域治領隊基蘭麥堅拿賽後表示：「積克泰萊冇受傷，我哋已經同足總作出舉報，佢哋會去處理。」