達成合約條款　加拿祖上「車」有運行咩？

曼聯翼鋒阿歷真度加拿祖「脫魔」有重大突破，根據「轉會權威」記者羅曼諾(Fabrizio Romano)爆料，呢位21歲阿根廷國腳已經接受車路士開出嘅個人待遇條款，同意加盟呢支世冠盃盟主，只要兩間球會傾掂轉會費就可以成事。不過，車路士鋒線有人滿之患，即使加拿祖上「車」，恐怕難上位。

阿歷真度加拿祖獲得多支西甲、意甲、德甲球隊垂青，但佢希望繼續踢英超，首選加盟車路士，雙方好快達成個人待遇條款。據悉曼聯要求5,000萬鎊(約5.3億港元)轉會費，如果車仔同意，就可以完成交易。加拿祖上季為曼聯上陣58場入11球及10次助攻，但仍然不滿未受重用，導致同領隊魯賓艾摩廉關係惡化，今夏被掛牌出售。

不過，有分析指加拿祖轉投車路士，上陣時間可能更加少，因為車仔已擁有多位翼鋒，包括柏度尼圖，以及新加盟嘅艾斯迪華奧、比諾傑坦斯，其中艾斯迪華奧近期表現大勇，有望穩坐正選，加拿祖想爭奪正選並非易事。