安迪歷成新「皇9」　前途重現曙光

皇馬神鋒基利安麥巴比早前改着10號球衣後，騰出9號波衫，呢個代表主力射手嘅冧巴現時正式落入安迪歷手上。呢位19歲巴西國腳因為長居後備，多次傳出打算離隊，但依家成為新「皇9」，意味獲新帥沙比阿朗素器重，前途重現曙光。

皇馬近代3大射手「大哨」朗拿度、C朗、賓施馬都着過9號，加上「麥總」上季亦身穿呢件球衣，奪得西甲及歐洲金靴獎，「皇9」歷史地位不亞於7號。早前傳出今屆世冠盃表現大勇嘅新星干沙路加西亞將會獲得9號，但最終安迪歷成為得主，佢原本件16號球衣，交畀干沙路加西亞。

安迪歷剛出道已被譽為「新大哨」，但上年夏天正式加盟皇馬後，上陣37次僅入7球，多數後備上陣，比賽時間甚少，令佢意興闌珊，有意轉會另謀發展。據悉皇馬會方今次用9號安撫安迪歷，希望佢留隊專心搏殺，但安迪歷近幾個月受傷患問題困擾，新一季能否翻生實屬疑問。