利物浦新球衣銷量暴增700%　華迪斯最受歡迎

利物浦今季球衣贊助商，從NIKE回歸Adidas，新波衫推出市場一星期，掀起搶購潮，銷量比上季同期急增700%，天價新兵科利安華迪斯嘅7號波衫最受歡迎，銷量屬於紅軍球員之冠。

根據利物浦官網公布，會方收到來自世界150個國家及地區嘅新球衣訂單，首周銷量比上季同期暴增700%，有80%銷量透過球會網上電商平台完成交易。科利安華迪斯嘅7號波衫最多人買，其次係因車禍逝世嘅迪亞高祖達20號球衣，紅軍早前表示，將印有祖達姓名嘅20號波衫銷售收入，撥入球會慈善基金，推動社區足球發展。

另外，利物浦新球衣發布活動亦引起巨大迴響，相關官方影片有超過4,000萬次觀看，屬於今季英超各隊之冠，同時社交網有1,700萬次互動及4.23億次曝光，「紅」透全球。利物浦同Adidas簽約10年，據悉每年贊助費達6,000萬鎊(約6.3億港元)，成為球會重要收入。