水晶宮面臨瓦解　格拉斯拿考慮離隊

水晶宮上季勇奪英足盃冠軍，不過球隊未有乘勝追擊，今個暑假未有積極增兵，更有伊比爾治伊斯同馬克古希正被豪門挖角，原本踢歐霸盃又被「降格」踢歐協聯。連串不幸事件據報令領隊格拉斯拿萌生去意，隨時劈炮唔撈！

水晶宮夏天只係買入後備門將禾達賓尼迪斯同左閘波拿蘇沙，對於要「4線作戰」嘅球隊肯定唔夠，格拉斯拿喺社區盾前表示：「我哋喺轉會市場表現得好被動。」被問到轉會不力會唔會影響佢去留，呢位奧地利教頭就回應：「睇下點。」

格拉斯拿同水晶宮只剩唔到1年合約，佢早前表示球會曾經承諾，會喺夏天盡早引入新球員，但結果並冇做到，就連伊比爾治伊斯同馬克古希留隊都成疑問，兩人目前被阿仙奴同利物浦挖角。被問到2位球星到9月份仲會唔會留低，格拉斯拿同樣唔敢保證：「佢哋喺社區盾肯定會落場。」格拉斯拿並冇回答9月後留隊問題。