紐卡素吞兩蛋兼傷「鋒」　搶購A米中堅補鑊

紐卡素喺周六(9日)晚熱身賽「Sela盃」以0比2不敵馬德里體育會，今夏開操後踢6場熱身賽未贏過，「喜鵲」收購射手處處碰壁之外，今仗仲有前鋒安東尼哥頓受傷，認真黑仔。唯一安慰係有望簽入AC米蘭中堅馬歷泰奧，希望先堵塞防線漏洞。

紐卡素上場同愛斯賓奴打和2比2，今仗遇上另1支實力更強嘅西甲球隊馬德里體育會，立即陷入劣勢，即使上半場力保不失，但換邊後5分鐘，被馬體會前鋒祖利安艾華利斯射入大門，跟住基沙文射成2比0。紐卡素防線出現唔少空位，如非馬體會多次浪費機會，恐怕「喜鵲」唔只輸2球。屋漏偏逢連夜雨，安東尼哥頓比賽末段傷出，未知需要抖幾耐，令鋒線雪上加霜。

紐卡素踢咗6場熱身賽，只有2和4負，可見缺少鬧轉會嘅射手阿歷山大伊沙克，對球隊影響非常大。紐卡素將於嚟緊周六(16日)晚首輪英超作客阿士東維拉，領隊艾迪侯域必須盡快想辦法提升球隊表現。

根據「轉會權威」記者羅曼諾(Fabrizio Romano)爆料，紐卡素已經接近斟掂馬歷泰奧，AC米蘭口頭上同意以4,000萬歐元(約3.7億港元)出售呢位24歲德國國腳，有望短期內完成交易。