羅拔佬缺陣首3場西甲　拉舒福特機會來了

巴塞隆拿將於周一(11日)凌晨出戰傳統季前熱身賽「甘柏盃」對科木，根據西班牙《阿斯報》爆料，巴塞首席射手羅拔利雲度夫斯基因為左腳肌肉不適缺陣，甚至可能無緣新球季首3場西甲，意味由曼聯來投嘅前鋒拉舒福特有機會擔正。

巴塞隆拿會方已經確認羅拔利雲度夫斯基踢唔到「甘柏盃」，至於呢位即將37歲嘅波蘭老將幾時可以復出，需要根據康復進度而定。《阿斯報》指「羅拔佬」將抖數星期，可能要等到9月中旬國際賽期之後，先至可以為巴塞隆拿披甲，意味將錯過首3場西甲對馬略卡、利雲特、華歷簡奴，希望趕及出戰第4場對華倫西亞。

由於季初巴塞隆拿對手實力比較弱，相信羅拔利雲度夫斯基缺陣影響唔大，根據教練費歷克上季做法，可能用翼鋒費倫托利斯客串中鋒位置，由拉舒福特擔正亦係選項之一，但呢位英格蘭國腳仍然未完成西甲球員註冊，能否參賽存在變數。