艾納斯想簽「冠軍命人」　C朗捧盃要靠佢

艾納斯繼早前簽入車路士前鋒祖奧菲歷斯後，又準備「增鋒」，根據「轉會權威」記者羅曼諾(Fabrizio Romano)爆料，呢支沙特阿拉伯豪門正式提出收購拜仁慕尼黑翼鋒京士利高文，如果簽到呢位「冠軍命人」，C朗應該可以一舉打破中東生涯錦標荒。

京士利高文仍有2年合約在身，但近年失去主力位置，加上年薪高達1,700萬歐元，拜仁會方有意出售呢位效力咗10年嘅29歲法國國腳，既然艾納斯願意接貨，拜仁冇理由拒絕，唔只可以收番一筆轉會費，仲可以節省人工支出。

估計京士利高文現時身價為3,000萬歐元(約2.7億港元)，對於艾納斯而言，簡直濕濕碎。據悉艾納斯向京士利高文開出一份3年合約，年薪達2,500萬歐元(約2.3億港元)，遠高於佢現時人工，雙方正在討論細節，有望成事。

京士利高文職業生涯效力過巴黎聖日耳門、祖雲達斯、拜仁慕尼黑，由2012/13年球季出道以來，曾連續11季有聯賽冠軍落袋，直至2023/24年球季先至斷纜，被指不敵「黑腳」哈利卡尼，但上季已重奪德甲冠軍，天生有冠軍命。

C朗加盟艾納斯2年半，仲未為球會捧過正式賽事冠軍，如果有「冠軍命人」京士利高文幫手，或者可以提升奪冠機會。