紐卡素斟波圖「Goal手」　應該唔怕被截胡

紐卡素今夏收購前鋒處處受阻，多位目標人選都被曼聯等球隊截胡搶走，根據英國《太陽報》爆料，「喜鵲」去到葡超搵人，睇中波圖射手奧摩洛迪安，準備將呢位身高1米93嘅高大前鋒收歸旗下。

現年21歲嘅奧摩洛迪安嘅父母係尼日利亞人，佢喺西班牙出生，加入CF格蘭納達青年軍受訓，2年前轉投馬體會，但立即被外借去艾拉維斯，上年夏天波圖以1,500萬歐元(約1.37億港元)向馬體會買入奧摩洛迪安一半擁有權。

呢位西班牙國腳轉戰葡超後，表現如有神助，上季各項賽事上陣45場入27球及3次助攻，代表作一定係歐霸盃主場對曼聯，個人梅開二度，打和3比3。

此外，奧摩洛迪安上季葡超有19球進帳，僅次於當時效力士砵亭嘅約基利斯，約基利斯早前已加盟阿仙奴，奧摩洛迪安有機會追隨其步伐登陸英超，估計佢現時身價達6,500萬鎊(約6.9億港元)。