施丹重投皇馬？沙比阿朗素驚未

皇馬前主帥施丹近日重返「銀河艦隊」主場巴拿貝球場，並着上新一季第3作客球衣，令人懷疑呢位法國球王回巢。不過，施丹今次只係擔任模特兒，並非同教練沙比阿朗素爭飯碗。

現年53歲嘅施丹身型仍然保持得非常好，着上皇馬第3作客球衣，猶如現役球員，佢將身穿波衫相片放上社交網，配上文字Hala Madrid(前進，馬德里)，惹起回巢疑雲。唔少網民趁機抽水，指皇馬會長皮里茲已經為新帥沙比阿朗素搵定「接班人」，一旦球隊今季表現未達要求，就搵施丹接手。

施丹球員及教練生涯都為皇馬捧過西甲及歐聯冠軍，最威水一定係以主帥身份協助「銀河艦隊」2016至18年連奪3屆歐聯冠軍，佢2021年離隊後，一直冇教波，盛傳將於明年世界盃決賽周後，接替迪甘斯，擔任法國領隊。