基沙文接班人　馬體會平簽拿玻里前鋒

西甲勁旅馬德里體育會執到平貨，將以2,200萬歐元(約2億港元)轉會費簽入拿玻里前鋒拉斯柏度尼，作為34歲老將基沙文嘅接班人。

馬體會原本計劃收購史特加23歲新星安素米洛特，但交易失敗，於是轉移目標斟介拉斯柏度尼，由於佢並非拿玻里主力，呢支意甲冠軍迅速同意放人，固定轉會費為2,200萬歐元，另有400萬歐元浮動轉會費。呢位25歲意大利國腳冇份參加拿玻里近日操練，將前往西班牙接受體測。

拉斯柏度尼3年前由薩斯索羅轉投拿玻里，總共上陣109場入18球，協助球隊奪得2次意甲冠軍。雖然呢位身高1米72嘅「矮腳虎」入波數字唔多，但勝在技術全面，可以勝任前鋒、翼鋒、進攻中場，踢法同基沙文相似，難怪馬體會教練施蒙尼認為佢屬於基沙文嘅合適替代人選。