沙拿操刀宴客！紅軍射輸12碼失落社區盾

英超開鑼前哨戰──英格蘭社區盾，周日（10日）於溫布萊球場上演，上季英超盟主利物浦，雖有新兵伊基迪基與謝利美費林邦齊入波，但法定時間被上屆英足盃冠軍水晶宮逼和2比2，去到互射12碼階段，更有王牌穆罕默德沙拿等3人射失，最終輸2比3，失落冠軍開壞個頭。

利物浦今仗強陣出擊，王牌穆罕默德沙拿、新兵科利安華迪斯、伊基迪基等悉數擔正，一開波即嚟料，僅4分鐘科利安華迪斯與伊基迪基於左路互傳，伊基迪基喺禁區推橫即射遠柱得手，極速打開紀錄，亦係佢加盟紅軍後首個士哥。

不過水晶宮喺17分鐘博到12碼，由桑馬迪達操刀扳平，但4分鐘後另一新兵謝利美費林邦右路一下變速突破，於窄位一記半傳半射，反而笠死水晶宮門將甸恩軒達臣，同樣攻入開齋波令紅軍再度領先。

易邊後水晶宮積極反撲，伊比爾治伊斯於左路窄位抽射，被艾利臣比加及時救出，77分鐘禾頓妙傳伊斯美拿沙亞快射追成2比2。由於法定時間打和，立即要互射12碼分勝負，利物浦有沙拿、阿歷斯麥亞里士打及哈維艾利洛先後射失，最終互射12碼輸2比3，令水晶宮首奪社區盾。