利物浦逃「社區盾魔咒」　施洛喜讚新兵表現

利物浦周日(10日)喺社區盾互射12碼不敵水晶宮，不過領隊施洛完全唔介意，賽後大讚一眾新球員表現，直指球隊依家嘅火力已經「夠贏」。數據顯示，近14年拎社區盾冠軍嘅球隊，只得1隊可以贏埋聯賽冠軍，利物浦失冠其實係逃過「社區盾魔咒」！

「社區盾魔咒」由來已久，由2011/12球季開始，近14屆社區盾，曼城同阿仙奴各拎5次冠軍，曼聯拎咗2次，利物浦同李斯特城各贏1次，不過除曼城18/19球季橫掃冠軍外，其餘13屆社區盾冠軍，最後都無緣英超錦標，「失冠率」高達93%，對於爭標份子嚟講，呢個冠軍唔要好過要。

利物浦領隊施洛賽後並唔失落，反而大讚球隊實力：「球隊最大問題係乜？我唔覺得有大問題，我哋大部份時間控制戰局。輸波一定會學到嘢，但都唔係學到咩新嘢，我哋喺季前熱身展示出創造機會嘅能力大大提升，上季我哋對水晶宮只係入1球，今次入到2球！」

兩位新兵伊基迪基同謝利美費林邦今場入波，施洛直指利物浦已經具備足夠實力衞冕英超：「鋒線上我哋有非常充足嘅選擇，足夠再次捧盃，所以我會專注依家已有嘅球員。當然如果睇番季前熱身嘅失球，防守係仍未達利物浦嘅水平。」

近14屆社區盾冠軍

球季 社區盾冠軍‧英超冠軍

11/12 曼聯‧曼城

12/13 曼城‧曼聯

13/14 曼聯‧曼城

14/15 阿仙奴‧車路士

15/16 阿仙奴‧李斯特城

16/17 曼聯‧車路士

17/18 阿仙奴‧曼城

18/19 曼城‧曼城

19/20 曼城‧利物浦

20/21 阿仙奴‧曼城

21/22 李斯特城‧曼城

22/23 利物浦‧曼城

23/24 阿仙奴‧曼城

24/25 曼城‧利物浦

25/26 水晶宮‧？？？