施斯高球衣號碼曝光　練習賽展現「空霸」威力

曼聯新簽射手班捷文施斯高周一(11日)開始參加操練，領隊魯賓艾摩廉為佢安排練習賽，呢位身高1米95嘅斯洛文尼亞國腳立即展現「空中霸王」威力頂入靚波，準備好周日(17日)晚首輪英超轟炸阿仙奴防線。

由於班捷文施斯高冇份參加曼聯季前熱身賽，教練團隊正在全力協助佢盡快融入球隊戰術體系，英國《太陽報》指施斯高周一(11日)踢練習賽表現出色，包括頭槌勁頂入網，最終兩隊打和7比7。

班捷文施斯高拒絕加盟歐聯份子紐卡素，反而選擇冇份踢歐洲賽嘅曼聯，令外界費解，佢話：「曼聯係一間不可思議，歷史悠久球會，球隊亦愈來愈好，有一種吸引力令人好想成為其中一員。」施斯高亦大讚魯賓艾摩廉係一位出色主帥，令人好想同佢合作，呢位前鋒咁識講說話，應該有運行。

另外，根據「轉會權威」記者羅曼諾(Fabrizio Romano)爆料，班捷文施斯高將會着30號球衣，佢之前效力薩爾斯堡、RB萊比錫都係着呢個「幸運號碼」。值得一提，曼聯新加盟小將迪亞高李安原本揀30號，但施斯高加盟後，佢決定「讓愛」改着35號。