孫興民接班人係佢　熱刺斟掂曼城翼鋒

孫興民離隊之後，熱刺急需要簽入翼鋒填補空缺，多間英國媒體指會方計劃收購曼城新星沙雲奴，呢位21歲巴西國腳亦同意加盟，只要兩間球會傾掂轉會費，就可以完成交易。

沙雲奴3年前已登陸歐洲，加盟曼城同一集團旗下球會特魯瓦，但立即被外借，包括2023/24年球季效力西甲球隊基羅納，上陣41場入11球及10次助攻，成功打出名堂。曼城上年夏天以3,000萬鎊向特魯瓦收購沙雲奴，佢上季為「藍月亮」上陣48次入3球及11次助攻，表現不俗。

由於曼城今夏收購卓基之後，翼鋒位置人滿之患更加嚴重，只要收到合理報價，唔排除出售沙雲奴，熱刺趁機提出斟介。沙雲奴為爭取更多上陣時間，希望入選巴西國家隊參加明年世界盃，亦願意加盟熱刺，估計佢現時身價達4,300萬鎊(約4.5億港元)。早前曾傳出熱刺有意收購皇馬前鋒洛迪高高斯，但「銀河艦隊」要求8,000萬鎊以上轉會費，熱刺買沙雲奴，明顯比較划算。