艾斯高長抖3個月　貝迪斯焗搶安東尼

貝迪斯中場艾斯高喺早前熱身賽對馬拉加，不幸受重傷，經過檢查之後，發現佢左腳骨折，估計最少需要休息3個月，會方急需增兵，可能下定決心收購曼聯翼鋒安東尼馬菲奧斯。

艾斯高上季為貝迪斯上陣33場入12球及11次助攻，協助球隊打入上屆歐協聯決賽，呢位33歲老將長抖，對貝迪斯打擊極大，為保持實力，惟有加快增兵。由於財力問題，會方原本對於是否收購曼聯翼鋒安東尼馬菲奧斯，存在疑慮，現時可能被逼孤注一擲，簽入呢位巴西國腳，據悉曼聯要求4,000萬歐元(約3.65億港元)轉會費。

不過，貝迪斯亦有「Plan B」，一旦同曼聯傾唔掂數，可能改簽皇馬中場丹尼施巴路斯，估計呢位29歲前西班牙國腳身價僅1,000萬歐元(約9,120萬港元)。