曼聯球員幫口　游說白禮頓中場入魔

雖然基安盧基當拿隆馬爆響口想入魔，但曼聯增兵首選並非門將，而係中場6號位，目標人物係白禮頓喀麥隆中場卡路士巴利巴，據報部分曼聯球員都私下接觸巴利巴，極力推銷曼聯。

集齊三箭頭後，魯賓艾摩廉下個目標係中場6號位，21歲嘅巴利巴係合適人選，不過白禮頓同該球員仲有3年合約，仲可以延長1年條款，所以唔心急放售，所以一直冇向曼聯還價，希望巴利巴留隊踢多1個球季，來季先出售。

曼聯擔心如果再等1年，2026世界盃後再斟巴利巴，可能會面對更激烈競爭，所以希望喺今季達成交易，並參考白禮頓早前出售祖奧柏度予車路士嘅6,000萬鎊價格，估計巴利巴轉會費亦在6,000萬至7,000萬鎊之間。

英國傳媒報道，為幫助球會增兵，曼聯幾位隊員，如巴利巴嘅喀麥隆同鄉奧拿拿同麥比奧莫，都私下聯絡巴利巴，向佢介紹曼聯情況，就算唔係立即加盟，都可以打定底，希望巴利巴優先揀曼聯。