要求29萬鎊周薪　洛迪高冇英超隊報價

今夏轉會窗其中一個焦點係皇馬巴西前鋒洛迪高高斯去向，據報皇馬至今未有收到任何英超球隊報價，洛迪高高斯可能要繼續留隊。

西班牙傳媒報道，截至本周一，皇馬未有收到任何關於洛迪高高斯嘅報價，原因是各豪門都知道，洛迪高高斯身價不會低於1億歐元(約9,120萬港元)，周薪要求29萬鎊(約306萬港元)，高門檻令轉會斟介幾乎無法展開。

同洛迪高高斯有過接觸就係曼城領隊哥迪奧拿，上季歐聯附加賽曼城不敵皇馬後，哥迪奧拿曾致電洛迪高高斯，邀請對方加盟，但遭洛迪高高斯拒絕。至於阿仙奴、利物浦、熱刺對洛迪高高斯感興趣，全部都係吹水，並無實質行動。

不過洛迪高高斯現時面對嘅最大問題係世界盃臨近，如果今季留喺皇馬繼續做後備，將大大影響佢入選巴西國家隊機會，所以當開季後如果仍然不獲沙比阿朗素重用，洛迪高高斯就要考慮哥迪奧拿嘅邀請。