莫拉達放棄波糧　提前離開加拉塔沙雷

加拉塔沙雷官方宣布，西班牙國腳艾華路莫拉達提前結束借用，即時離隊，據報其母會AC米蘭向加拉塔沙雷賠償500萬歐元(約4,560萬港元)，而莫拉達本人亦放棄65萬歐元波糧(約590萬港元)。

32歲嘅莫拉達今年1月由AC米蘭外借到加拉塔沙雷，為期1年，半季交出7球1助攻數據，表現唔差，AC米蘭當時收取600萬歐元借用費，並包含800萬歐元強制買斷條款，不過依家提前解約，一切作廢，AC米蘭仲要賠錢。

莫拉達在個人社交平台向加拉塔沙雷道別，當中講到自己放棄部分薪金，原因係有人唔遵守承諾同約定，令佢別無選擇，要放棄自己應得嘅權益。

不過加拉塔沙雷就高調歡送莫拉達，官方社交平台上載海報寫住「多謝」，事關佢哋收番AC米蘭嘅賠償，借用莫拉達半季只係用咗100萬歐元，仲有部分波糧唔使畀，幾乎免費咁滯。

報道指，科木有意壯大西班牙幫，莫拉達重返意甲後，好大機會被AC米蘭出售予科木。