【有片】費特轟入世界波！摩連奴率費倫巴治歐聯絕地反勝
去片睇費特轟入世界波
周三(13日)凌晨歐聯第3圈外圍賽次回合，由葡萄牙名帥摩連奴執教嘅費倫巴治，上演逆轉勝好戲，落後之下，以5比2反勝飛燕諾，前曼聯中場費特洛迪古斯轟入世界波，技驚四座。費倫巴治兩回合合計贏6比4，晉級附加賽，將硬撼賓菲加。
今場堪稱「紅魔打吡」，因為摩連奴曾執教曼聯，飛燕諾主帥尹佩斯球員時代踢過紅魔鬼，呢位荷蘭名宿亦曾於2015至18年效力費倫巴治。雙方首回合交鋒，尹佩斯帶領飛燕諾贏2比1，佢今仗領軍重返費倫巴治主場，亦冇面畀，上半場41分鐘，中堅渡邊剛接應罰球頂入，為飛燕諾打開紀錄，總比數領先至3比1。
費倫巴治瀕臨出局之際，幸好迅速由艾捷布朗頂入角球扳平，呢支土耳其勁旅士氣大振，上半場補時，上月由艾納斯來投嘅前鋒祖漢杜蘭射成2比1，兩回合總比數追和3比3。
費倫巴治得勢不饒人，戰至55分鐘出現精彩一幕，艾捷布朗逼甩對手腳下球，費特洛迪古斯拎到波之後，推前離門約25碼，遠射入世界波，令總比數反超前4比3，對於晉級極之關鍵。
跟住費倫巴治前鋒安尼斯利亦入1球，即使渡邊剛再次建功，為飛燕諾拉近比數，但補時塔利斯卡入波，協助費倫巴治贏5比2，兩回合合計反勝6比4，戲劇性打入附加賽，將對葡超勁旅賓菲加，爭奪「聯賽階段」資格。