當拿隆馬自行官宣離隊　曼城加入爭奪

意大利鋼門基安盧基當拿隆馬被巴黎聖日耳門(PSG)踢出歐超盃對熱刺嘅大軍名單之後，終於打破沉默，宣布離開呢支效力咗4年嘅法甲勁旅。英國傳媒指曼城準備出手，邀請當拿隆馬加盟，接替可能轉投加拉塔沙雷嘅門將艾達臣摩拉斯。

基安盧基當拿隆馬喺聲明中話：「自從來到巴黎第一日開始，無論場內或場外，我都傾盡全力去爭取位置，捍衞PSG大門，但好不幸，有人決定唔畀我留隊，唔可以再為球隊作出貢獻，我感到失望及悲傷，我希望有機會再喺王子球場同球迷見面及講再見，如果唔容許我咁做，我都想畀大家知道，你哋嘅支持對我意義重大，永遠唔會忘記呢份感情。」

現年26歲嘅當拿隆馬只剩下1年合約，但一直未能同球會達成續約協議，佢現時周薪為20萬鎊，有傳要求大幅加人工。PSG日前已簽入里爾門將盧卡斯捷華利亞，取代當拿隆馬，教練安歷基話球隊需要唔同類型門將。

不過，當拿隆馬嘅經理人安素拉奧拿澄清，指呢位意大利國腳一直想留隊，甚至願意減薪，但PSG管理層出爾反爾，導致無法達成協議，將會同法律團隊尋求解決方法，並承認當拿隆馬最大機會去英超搵食。

根據「轉會權威」記者羅曼諾(Fabrizio Romano)爆料，土超勁旅加拉塔沙雷已經接觸曼城，希望簽入艾達臣摩拉斯，「藍月亮」早已為呢位巴西國腳離隊做好準備，早前斥資3,100萬鎊回購般尼門將占士查科特，但呢位22歲英格蘭新星始終比較幼嫩，領隊哥迪奧拿想趁機簽入基安盧基當拿隆馬把關，PSG要求4,000萬鎊(約4.2億港元)轉會費，兩大球會將展開討價還價。