VVD接班人　利物浦預購「新尼斯達」

利物浦今夏大肆增兵，行動仍然未結束，根據「轉會權威」記者羅曼諾(Fabrizio Romano)爆料，紅軍準備收購帕爾馬中堅基奧雲尼里奧尼，栽培呢位18歲意大利新星作為34歲老將華基爾雲迪積克(VVD)接班人。

基奧雲尼里奧尼2年前以16歲零3個月為意丙球隊帕多瓦上陣，上年2月轉投意乙球隊森多利亞，僅過半年就被帕爾馬收購，極速實現「三級跳」踢意甲，上季17次上陣，並有1球進帳。

身高1米95嘅基奧雲尼里奧尼唔只防守穩健，而且擅於組織攻勢，踢法瀟灑，因而有「新尼斯達」之稱，獲得國際米蘭、AC米蘭、祖雲達斯垂青。利物浦勝在出手闊綽，提出以4,000萬歐元(約3.7億港元)收購里奧尼，並願意外借畀帕爾馬1季，令帕爾馬同意交易機會大增。

據悉基奧雲尼里奧尼已經同意加盟利物浦，等兩間球會達成協議，就可以成事。除咗基奧雲尼里奧尼，利物浦亦計劃收購水晶宮中堅馬克古希。