下一位施斯高？RB萊比錫簽巴西「長人」中鋒

RB萊比錫將射手班捷文施斯高出售畀曼聯，獲得7,400萬鎊轉會費，隨即出手收購前鋒填補空缺，根據「轉會權威」記者羅曼諾(Fabrizio Romano)爆料，RB萊比錫已經同意以總值2,500萬歐元(約2.3億港元)收購土耳其球隊哥茲塔比嘅前鋒羅姆路。

哥茲塔比上年1月向巴甲球隊帕拉尼恩斯借用羅姆路，今年1月正式買斷呢位23歲巴西前鋒，佢亦不負所望，上季土超有13球進帳，成為隊內首席射手。

身高1米93嘅羅姆路步大力雄，身型及踢法同1米95嘅班捷文施斯高相似，因而被RB萊比錫睇中。最重要係羅姆路身價平一大截，如果可以喺德甲交出表現，升值潛力非常大，隨時成為另1位班捷文施斯高都唔出奇。

另外，RB萊比錫亦有意收購狼隊前鋒法比奧施華，呢位23歲葡萄牙國腳上季被外借去西甲球隊拉斯彭馬斯，上陣25場入10球，估計身價為2,000萬歐元(約1.8億港元)。