致敬大帝功夫腳！紅魔搵Hea碧耍拳sell衫

新一季英超於周六凌晨（16日）開鑼，又係列強瘋狂出新波衫搶錢時間，曼聯梗係唔執輸，日前官宣推出全新第2作客「黑武士」球衣，仲搵埋名宿貝碧托夫耍武術，明顯係向「大帝」簡東拿致敬。

今次除咗隊長般奴費南迪斯、曼紐爾烏加迪、新兵施斯高等球星粉墨登場，Chok到行sell衫外，亦搵來名宿「Hea碧」貝碧托夫化身武術大師，教徒弟耍番一招半式兼面授機宜，例如蠻力非正道、要保持堅韌不屈精神、出擊時要快狠準等大道理，這正正係曼聯哲學，型到核爆。

曼聯呢款全黑+黃字+黃藍點綴衫領同袖口嘅設計，靈感似乎係來自1993至95年紅魔作客球衣，但講到最深刻印象，應該係1995年1月作客水晶宮，身穿「黑武士」嘅曼聯「大帝」簡東拿被逐後，忍唔到主場球迷挑釁，立即起「功夫腳」還拖，遭停賽8個月，魔性澎湃，亦令呢款波衫爆紅。