曼聯新星恐怖受傷急送院　賽事被迫腰斬

曼聯U21周四(14日)凌晨喺英格蘭國家聯賽盃作客譚禾夫，發生恐怖受傷事件，新年高價加盟嘅新星施高干尼比賽期間頭部嚴重受傷，喺場上面長時間接受治療，最終球證宣布賽事腰斬。曼聯隨後發聲明，指施高干尼已經清醒，情況穩定。

呢場A組賽事，曼聯U21有施高干尼、奧比馬田等球星擔正，比賽去到上半場尾聲，施高干尼喺防守角球嗰陣同對手頭撼頭，佢最初都勉強起番身，但隨即又再跌倒地上，軍醫即刻入場急救，並為佢戴上氧氣罩用擔架抬上救護車，治療時間長達15分鐘。

比賽半場踢成0比0，據報施高干尼喺救護車上仍需要急救，球證見情況惡劣，決賽將比賽腰斬。曼聯事後發聲明，指施高干尼清醒，情況穩定，而且可以同醫療人員溝通，目前喺醫院接受進一步嘅檢查，以防萬一。

現年19歲嘅施高干尼係馬里青年軍國腳，曼聯上年用100萬鎊將佢帶去球隊青年軍，司職防中嘅佢被形容為「新耶耶托尼」，被曼聯寄以厚望，甚至被睇好有機會喺今季打上一隊。