坦哈格要求再買3人　利華古遜同曼城搶人

前曼聯領隊坦哈格夏天接掌利華古遜帥印，但立即面對「星散」危機，呢位荷蘭教頭早前表示，希望喺夏天可以再簽多5名球員，球隊近日已連環簽入埃尼斯樸古，中堅洛斯巴迪亦即將加盟，而佢哋仲想同曼城爭奪摩納哥新星艾利奧捷。

利華古遜今夏大換血，教練沙比阿朗素過檔皇馬，科利安華迪斯、謝利美費林邦同格列沙加等主力都走晒，坦哈格表示：「華迪斯同沙加離隊？足球就係咁運作，球員來來去去避免唔到，當然一次走4、5個主力並唔理想，但我哋仍然要建立一支有力競爭嘅好球隊。利華古遜依家仍然需要4至5個新球員，仲有差唔多1個月時間，咩事都有機會發生。」

據德國《踢球者》報道，坦哈格仲想喺夏天轉會窗簽多3人，除西維爾中堅洛斯巴迪日內加盟外，下一個目標就係摩納哥翼鋒艾利奧捷，呢位23歲法國小將轉會費約6,000萬鎊，一直盛傳曼城想將佢招攬，但利華古遜可以保證佢主力位置，令坦哈格有機會實現呢個「夢想收購」。