冇彎轉！伊沙克搬屋放盤　利物浦準備加碼

瑞典前鋒阿歷山大伊沙克為轉會利物浦，同紐卡素徹底反面，繼日前表明永遠唔會再為「喜鵲」上陣後，日前再被影到已經搬離紐卡斯爾嘅住所，並且將租盤放返入市場，顯示佢唔係得個講字。

據英國《衞報》報道，伊沙克位於Ponteland嘅住所，日前出現搬運公司嘅車輛清空間屋，而地產公司亦將呢間月租6,950鎊嘅豪宅，放返出租盤市場，明顯係唔會再返去紐卡斯爾。

伊沙克日前向紐卡素表明，就算球會拒絕將佢賣去利物浦，佢亦唔會再為紐卡素上陣，寧願「一拍兩散」，有紐卡素球迷更焚燒伊沙克件波衫以示不滿。

英國《太陽報》報道，利物浦早前出價1.1億鎊被拒後，將會加碼再次開價，預算可以去到1.3億鎊。紐卡素目前表明上話唔會賣走伊沙克，但喺伊沙克強硬態度下，最後好可能會被逼放人。