京士利高文抵港簽約艾納斯　拍C朗強戰沙超盃

周四(14日)飛抵香港備戰下星期沙超盃嘅艾納斯，成功獲得強援加盟，拜仁慕尼黑接納3,500萬歐元轉會費後，據報法國國腳京士利高文周五(15日)由慕尼黑直飛香港簽約，好大機會喺下場對伊蒂哈德首演，同C朗拿度、沙迪奧文尼、祖奧菲歷斯組成夢幻攻擊線。

轉會權威記者羅曼諾報道，艾納斯開價3,000萬歐元，另加500萬歐元獎金條款，獲拜仁慕尼黑同意放人後，29歲嘅高文即刻起程飛香港，並會簽署總值2,500萬歐元嘅3年合約。沙特記者khaled Shahda透露，教練佐治捷西斯希望安排高文喺香港參加3課練習，下周二(19日)對伊蒂哈德首演。

艾納斯夏天同C朗續約後，今夏大事擴軍提升實力，早前已簽入葡萄牙國腳祖奧菲歷斯、西班牙中堅恩尼高馬天尼斯。今屆沙超盃首次喺香港舉行，準決賽先由艾納斯對伊蒂哈德、艾卡迪沙對吉達艾阿里就喺周三(20日)上演，8月23日係決賽，3場賽事都會喺香港大球場進行。