【有片】紐尼斯又入波 米祖域面臨解約
烏拉圭前鋒達雲紐尼斯由利物浦過檔希拉爾後，表現如魚得水，轉會1星期內踢2場比賽都有入波，周五(15日)喺德國熱身賽對曼海姆轟入「窩利」，佢嘅表現令希拉爾決定放走阿歷山大米祖域，甚至可能提前解約。
希拉爾今場對德丙嘅曼海姆，係球隊德國集訓最後一戰，法國新兵迪奧靴南迪斯轟入世界波，加上紐尼斯近門窩利抽入，協助希拉爾贏3比2。紐尼斯喺上場對瑞士球會阿勞，後備上陣亦窄角度抽入，2場入2球狀態勁弗。
沙特媒體報道，隨住紐尼斯加盟，希拉爾將放走塞爾維亞前鋒阿歷山大米祖域，球會將接納「先借後賣」方式交易，如果最後無人問津，甚至會賠償2,500萬歐元提前解約。有傳英超新升班球隊列斯聯，有意將米祖域收歸旗下。