爭做曼城新核心　卓基改着10號

英超開鑼前夕，曼城球衣號碼有變動，基亞利殊日前被外借去愛華頓之後，騰出10號球衣，新兵卓基隨即出手，獲得呢個代表王牌核心嘅冧巴，亦證明領隊哥迪奧拿對呢位21歲法國國腳寄予厚望。

卓基之前效力里昂着18號，今年6月以3,650萬歐元(約3.3億港元)轉會費加盟曼城，簽約5年，呢位新星當時揀29號球衣，並着住呢個冧巴參加世冠盃，分組賽對艾阿恩，取得入「城」首個入波，表現搶鏡。

卓基趁基亞利殊離隊，搶走對方10號球衣，自信可以成為球隊新進攻核心，哥迪奧拿批准佢着10號，亦反映即使基亞利殊明夏外借屆滿，都冇打算收回佢，呢位昔日「億元先生」，曼城生涯可能已提早結束。

值得一提，今季有多位球星改着10號，包括皇馬射手基利安麥巴比、車路士中場高爾彭馬、拜仁慕尼黑天才球員穆斯亞拿，唔少「藍月亮」球迷都對卓基充滿期待。與此同時，曼城準備將另1位新兵尼柏外借去英冠球隊米杜士堡，畀呢位18歲挪威新星吸收比賽經驗。