英超新季新規例　一個改變勢引無限爭議

新一季英超周六(16日)凌晨開鑼，新球季亦有新規例出現，不過英超球證同VAR嘅水平一向為人詬病，今季英超將會嚴厲禁止禁區內嘅拉扯同阻擋動作，預計判罰12碼嘅次數將大大增加，不過判罰尺度點樣拿捏，一向都係球證「說子算」，勢引無限爭議。

今季英超球例修改，包括門將持球超過8秒會被判輸角球、射12碼嗰陣意外「雙重觸球」可以重射等等，但最關鍵係球證收到指引，將會嚴厲判罰禁區內拉扯動作，英超向來多身體碰撞，防守死球嗰陣兩隊球員掹手、拉衫等動作司空見慣，但新一季就好可能會被罰12碼。

英超指引列明，球證會視乎拉手/拉衫嘅時間有幾長、阻擋嘅嚴重程度、單手定係雙手、有冇踢波嘅意圖、雙方係咪互相拉扯等因素，去決定係咪判罰12碼，但呢啲準則通通都係球證主觀意見，根據英超球證過往嘅表現，好難令球迷相信會有一致嘅執法尺度。

事實上，英超過去引入新例，喺球季初都會搞到一鑊泡，19/20球季引入手球新例，結果出現季初出現大量「波打手」判罰，令12碼數量激增，未夠半季就降低番判罰尺度；上季英超嚴厲執行「吹停後球員唔可以掂波」規例，季初矯枉過正製造幾單爭議紅牌後，季中開始已經明顯鬆手。一眾英超球隊，開季一定要打醒精神。