施洛：利物浦係英超最誠實球隊　暗諷水晶宮

英超冠軍利物浦周六(16日)凌晨展開衞冕之旅，領隊施洛賽前表示，「紅軍」係全英超最誠實嘅球隊，所以喺比賽期間經常「蝕底」，更諷刺水晶宮喺社區盾有精湛「演技」，成功得到球證眷顧。

施洛表示：「如果要揀一支最誠實嘅球隊，利物浦肯定係第1位，我有時都會責怪球員，點解被侵犯嗰陣唔誇大啲，等球證知道你畀你侵犯。好似社區盾，加普同域斯畀對手又推又拉，但佢哋實在太誠實唔肯跌低。球證話因為你冇跌低，所以唔會判罰，我覺得好奇怪。」施洛進一步諷刺水晶宮：「冇耐之後，有水晶宮球員根本冇被侵犯，但佢跌低就得到球證判罰。喺社區盾我哋有大量控球權，但利物浦被吹犯規13次、水晶宮只係被吹罰5次，就係最佳證明。」

賴恩格雲貝治上季煞科戰因「插水」食紅牌，今季開鑼戰要停賽，施洛就耿耿於懷：「我哋利物浦從來唔插水、唔拖延時間，係英超最公平嘅球隊，但球證竟然累到賴恩格雲貝治要停賽，一啲都唔有趣。不過，我哋既然用公平競技贏到冠軍，有咩需要改變？」