英超唯一　車路士球衣冇胸前廣告

雖然貴為「世界冠軍球會」，但車路士今季英超開鑼階段成為唯一一支球衣冇「心口廣告」球隊，同樣情況曾經在2023至24年球季出現，胸前「白雪雪」比賽。

早前諾定咸森林趕及在英超開鑼前，與一間美國博彩及娛樂企業Bally's Corporation達成協議成為該隊球衣「心口廣告」贊助商，令車路士成為今季英超唯一一隊冇「心口廣告」球隊。

英國傳媒報道，其實車路士並非冇客路，之前已收到多份報價，但球會高層希望搵個合適嘅長期合作夥伴，唔想匆忙簽約，目標係每年收取6,000萬至6,500萬鎊贊助費(約6.36億至6.89億港元)。

未來能夠成為車路士「心口廣告」嘅潛在贊助商，係沙特阿拉伯新成立嘅利雅德航空Riyadh Air，佢哋係車路士主要贊助商候選者之一。