「棄子」基艾沙變英雄　利物浦絕殺般尼茅夫

新一季英超周六(16日)凌晨開鑼，揭幕戰峰迴路轉，上季冠軍利物浦主場出擊，領先2球優勢下，被般尼茅夫扳平2比2，全靠後備上陣嘅費達歷高基艾沙88分鐘射入致勝1球，加上穆罕默德沙拿補時埋齋，險勝4比2打響頭炮。季前面臨被「清洗」嘅基艾沙加盟紅軍1年以來，取得首個英超入球，成為贏波大功臣，經此一役後，有望獲得留用。

利物浦原本開局唔錯，踢到37分鐘由新兵艾基迪基射入打開紀錄，換邊後冇耐，呢位23歲前鋒回傳畀加普射成2比0，成為繼2022年8月達雲紐尼斯後，近3年首位第1場為紅軍踢英超就有入波兼助攻嘅球員。

當球迷以為利物浦可以輕鬆全取3分時候，戰情出現戲劇性發展，64分鐘般尼茅夫打反擊，由前鋒安東尼施美安射入1球，僅過12分鐘，呢位25歲加納國腳「球王上身」，由後場開始盤球快速推進，殺到禁區邊射入扳平2比2，技驚四座。

利物浦面臨失分之際，主帥施洛82分鐘換入費達歷高基艾沙，呢位27歲意大利國腳僅上陣6分鐘，把握對手解圍不遠凌空射入，協助紅軍再次領先，補時穆罕默德沙拿個人表演射成4比2奠定勝局。

費達歷高基艾沙上年夏天由祖雲達斯加盟利物浦，因為受傷及狀態持續低迷，上季只係上陣14次僅入2球，而且都係盃賽入波，一直有傳會方打算放走佢，甚至冇份參加早前「亞洲之旅」熱身賽。

不過，基艾沙今仗首嘗英超入球滋味，由「棄子」變救世主，前途有望大逆轉。賽後佢表明想留隊：「我喺利物浦過得非常開心，將向會方表達留隊意願，要為球隊贏好多冠軍。」此外，基艾沙話入波後，腦海只想起7月初因車禍逝世嘅隊友迪亞高祖達，心情非常複雜，紅軍4位球員入波後，都有做出悼念祖達嘅動作。