格連活特忽然啞火　馬賽踢多一人都輸

周六(16日)凌晨法甲開鑼立即爆出冷門，上季亞軍馬賽大部分時間踢多1人優勢下，卻於補時失守，作客被雷恩以1比0絕殺。近期熱身賽頻頻入波嘅馬賽射手格連活特，今仗忽然啞火，加上隊友2次攻門中柱，注定冇運行輸波。

上半場31分鐘，雷恩19歲後衞艾邦度從後踢對手米高梅里路，球證睇完VAR後，直接出示紅牌將佢趕出場，馬賽趁機加強攻勢，包括拉比奧特遠射中柱彈出，換邊之後，輪到米高梅里路頭槌攻門中柱。

雷恩避過兩劫，果然有後福，教練比耶85分鐘作出「神換」，調入魯杜域巴拉斯，呢位27歲中場補時1分鐘突破馬賽越位陷阱，單刀射入全場唯一入波，戲劇性全取3分。

格連活特近6場熱身賽射入7球，但今場聯賽踢足全場卻食白果，表現令人失望，至於上場熱身賽射入阿士東維拉2球嘅老將奧巴美揚亦冇料到，鋒線忽然集體啞火，成為輸波主因。