【官宣】利物浦再增兵　18歲意大利中堅加盟

利物浦今夏大肆增兵，又有新球員加盟，宣布簽入年僅18歲嘅帕爾馬中堅基奧雲尼里奧尼，據悉轉會費為2,600萬鎊(約2.76億港元)，雙方簽約6年，佢獲得15號球衣。

早前已傳出利物浦準備收購中堅，目標包括基奧雲尼里奧尼、水晶宮主將馬克古希，現時率先簽入里奧尼。呢位意大利新星簽約後話：「冇可能拒絕加盟利物浦，我感到非常榮幸、開心、興奮，實在太瘋狂。」

身高1米95嘅基奧雲尼里奧尼2年前以16歲零3個月為意丙球隊帕多瓦上陣，上年2月轉投意乙球隊森多利亞，僅過半年就被帕爾馬收購，極速實現「三級跳」踢意甲，上季17次上陣，並有1球進帳。

早前傳出利物浦收購基奧雲尼里奧尼後，會將佢外借返帕爾馬，但紅軍主帥施洛現時決定留用佢，可能同中堅伊巴希馬干拿迪喺英超揭幕戰表現太差有關，唔少利迷寸呢位法國國腳如果冇心留隊，可以盡快轉投皇馬，盛傳「銀河艦隊」有意簽入佢。