施斯高正選鬥阿仙奴？艾摩廉咁回應

曼聯將於周日(17日)晚英超主場迎戰阿仙奴，各界都好關注新加盟前鋒班捷文施斯高，會唔會正選上陣，領隊魯賓艾摩廉透露，呢位22歲斯洛文尼亞國腳已經準備就緒，暗示佢有望擔正。

班捷文施斯高剛成「魔」一星期，未曾為球隊踢任何熱身賽，但曼聯急需要1位中鋒，傳媒關注佢會唔會立即以正選身份上陣鬥阿仙奴，魯賓艾摩廉話：「我哋冇太多時間，施斯高身體狀態方面，已經準備好，佢非常聰明，所有決定都經過深思熟慮，每日都操練體能，非常投入足球，唔需要擔心佢，至於是否踢正選，到時再做決定，任何球員都有機會擔任正選。」換言之，曼聯有可能派出3位新兵班捷文施斯高、馬菲奧斯根夏、麥比奧莫一齊擔正，打造最強鋒線。

另外，魯賓艾摩廉表示，早前受傷嘅門將奧拿拿已經痊愈，可以隨時候命，現時只有利辛度馬天尼斯、馬沙拉奧因傷缺陣。