般尼門將觸犯新例！李察利臣雙金球助熱刺大勝

英超周六晚10點場，熱刺主場3比0大勝新升班嘅般尼。今場賽事先有般尼門將觸犯英超新例創歷史，其後巴西前鋒李察利臣連續兩個窩利起孖，協助熱刺大勝而回，前隊長孫興民離隊後，熱刺正式進入新時代。

開賽僅3分30秒，般尼門將杜巴夫卡就創歷史，佢接球後拖延間，持球長達14秒，被判觸犯英超新例，持球超過8秒，結果被判罰1個角球，成為新例受刑者，亦係首宗案例，之後杜巴夫卡唔敢再拖時間，接球就嗱嗱聲開波。

至於今場賽事戰況一面倒，剛失落歐超盃嘅熱刺，搵般尼祭旗，開賽10分鐘，古度斯右路傳個中腰波，李察利臣門前第一時間窩利抽入。

下半場60分鐘，李察利臣再度建功，同過程同首個入球幾乎一樣，古度斯右路傳中，今次李察利臣凌空窩利倒掛金鈎勁射破網，熱刺贏到2比0，而李察利臣呢個入球，夠晒資格入選今季候選金球。

6分鐘後，班倫莊臣接應柏比沙亞傳送，單刀射成3比0為熱刺埋齋，全取3分。