曼城派4蛋霸氣回歸　迪布尼接班人華麗現身

上季「四大皆空」嘅曼城，周日(17日)凌晨英超開咧戰霸氣回歸，憑兩位新加盟球星入波，加上王牌射手艾寧夏蘭特梅開二度，作客輕鬆以4比0大炒狼隊登上榜首。荷蘭中場雷恩達斯英超首演1傳1射，全能表現成功取代奇雲迪布尼位置，領隊哥迪奧拿亦大讚佢會係曼城長年核心。

曼城今場雖然有洛迪卡斯簡迪、菲爾科頓等球星缺陣，不過實力仍遠勝主隊，34分鐘雷恩達斯中路妙傳，歷高利維斯傳中畀夏蘭特近門射入；3分鐘後雷恩達斯快速反擊射成2比0。61分鐘雷恩達斯又交靚助攻，巧妙回傳畀後上嘅夏蘭特射入，至於另一新兵卓基就喺81分鐘遠射埋齋。

曼城上季落後冠軍利物浦13分， 夏天又有奇雲迪布尼離隊，但兩位新兵雷恩達斯同卓基就表現出色，哥迪奧拿賽後表示：「曼城成日買到好球員，我搵唔到一個新兵係差，我嘅任務係將佢哋聯繫。雷恩達斯好出色，防守、進攻瓣瓣有，佢係會成為曼城未來幾年核心嘅頂級收購。」

荷蘭中場雷恩達斯夏天由AC米蘭加盟，今場除1入波同1助攻外，仲有3次射門、3次傳中、22次前場傳送同82次觸球，全場不斷走位跑動，令曼城運作非常流暢，被指成功接班奇雲迪布尼中場大腦位置。27歲嘅雷恩達斯賽後話：「一個好好嘅開始，呢場勝利會係我哋繼續前進嘅起點。」