爭議入波加對手兩紅牌　巴塞大勝響頭炮

巴塞隆拿周日(17日)凌晨西甲打響頭炮，作客3比0大破馬略卡。今季改着10號嘅拉明耶馬1射1傳表現出色，加上馬略卡上半場6分鐘內連拎2張紅牌，成為大勝主因，不過巴塞教練費歷克就指球隊整體演出麻麻，只發揮出5成水準。

今場7分鐘耶馬就交貨，右路精彩傳中畀拉芬夏比洛尼近門頂入。23分鐘出現爭議入波，耶馬右路勁射，安東尼奧雷路食波餅後倒地，當時馬略卡球員都停低，但費倫托利斯就搶波兼遠射轟入，馬略卡球員投訴無果，球證判入球有效。

馬略卡之後愈踢愈急，33分鐘先有文奴摩蘭尼斯踢跌耶馬，拎第2面黃牌被逐，6分鐘後輪到梅利基衝門，舉腳太高踢中祖安加西亞，直接拎紅牌出場。踢多2個嘅巴塞，去到補時4分鐘再由耶馬入波，湊成3比0大勝，開咧戰順利拎晒3分。

雖然第1場就大勝而回，不過德國籍教練費歷克賽後表示：「拎3分好重要，但我唔係咁鍾意今場比賽，一早領先2球兼踢多2個之後，我哋應該繼續控制比賽同爭取入波，但球隊只係發揮出5成水準，呢點係唔可以接受。」